जयसिंगपूर : प्रतिनिधी
शिरोळ तालुक्यातील ग्रामीण परिसरातील आरोग्य सुविधांचा दर्जा अधिक उंचावण्यासाठी टाकवडे, हसुर आणि शिरटी या तीन गावांसाठी स्वतंत्र आरोग्य उपकेंद्रांच्या इमारत बांधकामासाठी प्रत्येकी ६१ लाख १८ हजार रुपयांचा, असे मिळून एकूण १ कोटी ८३ लाख रुपयांचा निधी मंजूर झाल्याची माहिती आमदार राजेंद्र पाटील यड्रावकर यांनी दिली. हा निधी १५ व्या वित्त आयोगाच्या माध्यमातून देण्यात आला असून लवकरच कामाला प्रत्यक्ष प्रारंभ होणार आहे.
ग्रामीण आरोग्यसेवा अधिक सक्षम करण्यासाठी या उपकेंद्रांच्या इमारती अत्यंत गरजेच्या होत्या. शिरोळ तालुक्यातील टाकवडे, हसुर आणि शिरटी या गावांमध्ये लोकसंख्या वाढत असल्याने प्राथमिक उपचार, माता-बाल आरोग्य सेवा, लसीकरण, नियमित तपासण्या, तसेच आपत्कालीन परिस्थितीत तातडीची मदत मिळणे याची आवश्यकता सातत्याने जाणवत होती. हे लक्षात घेऊन आमदार राजेंद्र पाटील यड्रावकर यांनी पाठपुरावा करून तिन्ही उपकेंद्रांसाठी निधी मिळवला.
टाकवडे उपकेंद्रासाठी ६१ लाख १८ हजार, हसुर उपकेंद्रासाठी ६१ लाख १८ हजार आणि शिरटी उपकेंद्रासाठी ६१ लाख १८ हजार रुपये अशी निधीची तरतूद करण्यात आली आहे. आधुनिक सुविधा, तपासणी कक्ष, औषध वितरण केंद्र, प्रसूति कक्ष, लसीकरण जागा, तसेच नागरिकांना प्राथमिक उपचार देण्यासाठी आवश्यक असणारी सर्व साधने या इमारतींत उपलब्ध करण्यात येणार आहेत. बांधकाम पूर्ण झाल्यानंतर ग्रामीण भागातील रुग्णांना वेळेत आणि तातडीच्या सेवेसह स्थानिक पातळीवरच उपचारांची सोय होणार असून त्यांना मोठा दिलासा मिळणार आहे.
यामुळे गावांमध्ये वारंवार मोठ्या शहरातील सरकारी दवाखान्यांवर अवलंबून राहावे लागणाऱ्या नागरिकांना मोठा दिलासा मिळणार आहे. विशेषत: गर्भवती महिला, लहान मुले, जेष्ठ नागरिक आणि नियमित औषधोपचार घेणाऱ्या रुग्णांना या उपकेंद्रांमुळे मोठी सुविधा उपलब्ध होणार आहे. या उपकेंद्रांमुळे प्राथमिक आरोग्यसेवेचा दर्जा उंचावण्यास तसेच प्रतिबंधात्मक आरोग्य कार्यक्रम राबवण्यास मदत होणार असल्याचे आमदार यड्रावकर यांनी सांगितले.
हा निधी मंजूर केल्याबद्दल आमदार राजेंद्र पाटील यड्रावकर यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजितदादा पवार आणि आरोग्यमंत्री प्रकाश आबिटकर यांचे मनःपूर्वक आभार मानले आहेत.
