शिरोळ : प्रतिनिधी
शिरोळच्या सर्वांगीण विकासाचा संकल्प हृदयाशी बाळगून काम करणाऱ्या आणि नगरपरिषदेच्या स्थापनेसाठी आपल्या पंचायत समिती सदस्यपदाचा त्याग करणाऱ्या सौ.योगिता सतिश कांबळे यांच्या प्रचाराला शहर व परिसरातील नागरिकांकडून उत्स्फूर्त प्रतिसाद मिळत असल्याचे चित्र सध्या सर्वत्र दिसत आहे. प्रभागनिहाय घेतल्या जाणाऱ्या संपर्क भेटींमध्ये उमटणारा विश्वास,घरोघरी संवादातून जाणवणारा नागरिकांचा अभूतपूर्व पाठिंबा आणि विकासाभिमुख नेतृत्वाची स्पष्ट छाप यामुळे त्यांच्या प्रचाराची गती दिवसेंदिवस वाढताना दिसत आहे.
सौ.योगिता कांबळे यांनी गेल्या काही वर्षांत सामाजिक, शैक्षणिक व स्थानिक प्रशासनिक प्रश्नांशी निगडित विविध उपक्रमांत सक्रिय सहभाग नोंदवला आहे. त्यांची प्रामाणिक कार्यशैली, लोकसंग्रहाची हातोटी आणि सर्वसमावेशक विकासावर आधारित दृष्टिकोन यामुळे स्थानिक नागरिकांमध्ये त्यांच्याबद्दल सकारात्मक भावना निर्माण झाल्याचे अनेक रहिवाशांचे मत आहे. विविध प्रभागांमध्ये आयोजित मार्गदर्शन बैठका, महिला व ज्येष्ठ नागरिकांशी संवाद तसेच युवकांशी थेट संवाद साधत समस्यांवर चर्चा करण्यावर त्यांनी विशेष भर दिला आहे.
प्रचारादरम्यान नागरिकांनी मांडलेल्या पाणीपुरवठा, रस्ते, स्वच्छता, वाहतूक व्यवस्था, सुरक्षितता आणि सार्वजनिक सुविधांच्या उन्नतीसंबंधीच्या विविध मागण्यांवर त्यांनी लक्ष केंद्रीत केले आहे.शिरोळच्या सर्वांगीण प्रगतीसाठी आवश्यक असलेल्या दीर्घकालीन उपाययोजनांवर त्यांनी नागरिकांसमोर आपली भूमिका स्पष्ट केली आहे. स्थानिक पातळीवरील कामकाजात पारदर्शकता,जबाबदारी आणि विकास प्रक्रियेत नागरिकांचा सहभाग यावर त्यांनी विशेष भर दिला आहे.शिरोळला सक्षम, स्वच्छ, प्रगत आणि सुरक्षित दिशेने नेणाऱ्या नेतृत्वाची गरज असल्याचे नागरिकांकडून मोठ्या प्रमाणात व्यक्त होत असून अनेक ठिकाणी झालेल्या बैठकीत नागरिकांनी आपला विश्वास व्यक्त केला आहे.
संवादाच्या माध्यमातून लोकांच्या अपेक्षा,तक्रारी व सूचना समजून घेण्याचा प्रयत्न प्रचारादरम्यान सातत्याने सुरू आहे.सौ.योगिता कांबळे यांचा प्रचार वाढत्या प्रतिसादामुळे अधिक वेग घेत असून आगामी काळात प्रचाराच्या विविध कार्यक्रमांना आणखी गती मिळणार असल्याची माहिती त्यांच्या प्रचार कार्यकर्त्यांनी दिली.शिरोळमध्ये सध्या निवडणूक वातावरण चांगले रंगत असून नागरिकांची उत्सुकता वाढत चालली आहे.
